Հայ և ռուս փորձագետները կարևորում են նոր մեխանիզմների ներդրմամբ ռուսաց լեզվի դասավանդումը հայկական ուսումնական հաստատություններում

0
60

ԵՐԵՎԱՆ, 16 ՆՈՅԵՄԲԵՐԻ, ԱՐՄԵՆՊՐԵՍ: Հայ և ռուս փորձագետները նոյեմբերի 16-ին Կլոր սեղանի շրջանակներում քննարկեցին հումանիտար ոլորտում երկու երկրների հարաբերություններին առնչվող  արդի հիմնախնդիրները: «Արմենպրես»-ի հաղորդմամբ` «Ինտեգրացիա և զարգացում» հետազոտության և վերլուծության հասարակական կազմակերպության նախագահ, Եվրասիական փորձագիտական ակումբի համակարգող, քաղաքական վերլուծաբան Արամ Սաֆարյանն ասաց, որ հայ-ռուսական արդի հիմնախնդիրներից  մեկը լեզվի պահպանման և զարգացման  հարցն է:

«Հայ և ռուս ժողովուրդներն ունեն բարիդրացիական ջերմ հարաբերություններ և նրանց կապող օղակներից մեկը լեզուն է: Շատ կարևոր է հասկանալ, թե ինչ մակարդակի վրա է գտնվում ռուսաց լեզվի և գրականության, ինչպես նաև՝ երկու ժողովուրդների պատմության դասավանդման  մակարդակը  մեր դպրոցներում  և բուհերում»,-ասաց Սաֆարյանը: Նա հույս հայտնեց, որ ծավալված քննարկումների արդյունքում կառաջարկվեն նոր լուծումներ և մեխանիզմներ`  ռուսաց լեզվի դասավանդման արդիականացման հետ կապված:

Նա նշեց, որ տասնյակ հազարավոր մեր հայրենակիցներ այսօր գտնվում են Ռուսաստանի Դաշնությունում` աշխատանքային միգրանտի  կարգավիճակով: Հազարավոր երիտասարդներ բարձրագույն կրթություն են ստանում Ռուսաստանի բուհերում:  Հայաստանում տուրիստական ամենամեծ հոսքն ապահովում են Ռուսաստանի քաղաքացիները և ավելի քան 100 հազար Ռուսաստանի քաղաքացիներ այսօր ժամանակավոր բնակություն են հաստատել Հայաստանում:

«Այս ամենը նշանակում է, որ կյանքն է ստիպում օրեցօր էլ ավելի լավ տիրապետել ռուսաց լեզվին և գրականությանը: Որոշ պրոֆեսորներ և դասախոսներ ահազանգում են , որ բուհերում ռուսաց լեզվի իմացության մակարդակը բավարար չէ: Բայց մենք ունենք նաև երիտասարդներ, ովքեր ռուսաց լեզվով մեծ պատվով ներկայացնում են հարազատ բուհերը Ռուսաստանում և այլ երկրներում»,-ասաց Արամ Սաֆարյանը:

Նա վստահեցրեց, որ ռուսաց լեզվին լավ տիրապետելը չի նշանակում չուսուցանել այլ երկրների լեզուներ: Անհրաժեշտ համարեց գտնել նոր լուծումներ ռուսաց լեզվի իմացության մակարդակը ուժերի ներածին չափով առաջ տանելու համար:

Հայաստանում «Մոսկվայի տան» ներկայացուցիչ Տատյանա Գրոնսկայան  ևս կարևորեց թեմայի վերհանումն  ու դրա շուրջ քննարկումների ծավալումը:

«Կարծում եմ, որ հաջորդ տարի ԱՊՀ երկրներում ռուսաց լեզվի տարվա անցկացման ծրագիրը ևս դրականորեն կազդի այս հիմնախնդրի լուծման համար և կտա նոր հնարավորություններ առաջ մղելու, պահպանելու ռուսաց լեզուն»,-ասաց նա:

Կլոր սեղանի կազմակերպիչներն էին Հաղորդակցության զարգացման ազգային գիտահետազոտական ինստիտուտը (Մոսկվա), ԵՊՀ միջազգային հարաբերությունների ֆակուլտետի Ռուսագիտության կենտրոնը, «Ինտեգրացիա և զարգացում» ՀԿ-ն և Եվրասիական փորձագիտական ակումբը։  Կլոր սեղանին առցանց մասնակցեցին նաև  Մոսկվայից ժամանած փորձագետները:

Armenpress.am

LEAVE A REPLY

Please enter your comment!
Please enter your name here