Խորհրդարանական ընտրությունների ֆավորիտները ռուսամետ ուժերն են: Այս մասին լրագրողների հետ հանդիպմանը հայտարարեց «Ինտեգրացիա և զարգացում» ՀԿ նախագահ Արամ Սաֆարյանը՝ մատնանշելով «Ծառուկյան» դաշինքն ու Հանրապետական կուսակցությունը: Սաֆարյանը ներկայացրեց հայ-ռուսական հարաբերություններին նվիրված հարցման արդյունքները, որոնք վեր են հանում հանրության վերաբերմունքը և նշեց, որ Հայաստանում կա երեք հիմնական քաղաքական ուժ, որոնք հայ-ռուսական հարաբերությունների զարգացման, ամրապնդման և խորացման գործում լուրջ ներդրում ունեն:
Նրա խոսքով, արդեն տասը տարի է, ինչ իշխող կուսակցությունը թե՛ խորհրդարանում, թե՛ ՀՀ հասարակական և քաղաքական դաշտում առաջ է տանում հայ-ռուսական բազմաբնույթ հարաբերությունները զարգացնելու և խորացնելու հնարավորությունը, սերտ հարաբերություններ ունի ՌԴ իշխող՝«Единая Россия» կուսակցության հետ:
«Համաձայն հետազոտության, երկրորդ քաղաքական ուժը Գագիկ Ծառուկյանի գլխավորած «Ծառուկյան» դաշինքն ու «Բարգավաճ Հայաստան» կուսակցությունն է, որը 2007 թվականից համագործակցության համաձայնագիր ունի ՌԴ իշխող՝ «Единая Россия» կուսակցության հետ: Ու չնայած այն հանգամանքին, որ դաշինքում կան գործիչներ, որոնք քիչ ներդրում չունեն ՀՀ—ՌԴ հարաբերությունների զարգացման գործում, այդուհանդերձ այդ հարաբերությունների առյուծի բաժինը ընկնում է Գագիկ Ծառուկյանին: Նրան են ճանաչում Մոսկվայում, նրա հետ են ուզում գործ ունենալ, նրա հետ կան հարաբերություններ»,-ասաց Արամ Սաֆարյանը:
Իսկ երրորդ քաղաքական ուժը «Հայ ազգային կոնգրեսն» է, որի առաջնորդ, ՀՀ առաջին նախագահ Լևոն Տեր—Պետրոսյանի օրոք 90-ական թվականներին հիմք է դրվել հայ-ռուսական բազմավեկտոր համագործակցության նորօրյա փուլին:
Հիշեցնենք, համաձայն սոցիոլոգիական հարցումների՝ ապրիլի 2-ին կայանալիք խորհրդարանական ընտրություններում առաջատարն այս պահին «Ծառուկյան» դաշինքն է, Հանրապետական կուսակցությունը երկրորդ տեղում է:
Աննա Հովակիմյան
