ԵՐԵՎԱՆ, 30 ՄԱՅԻՍԻ, ԱՐՄԵՆՊՐԵՍ: Եվրասիական տնտեսական միությունում Հայաստանի և Ղազախստանի միջև լավ հարաբերություններ են զարգանում:
«Արմենպրես»-ի հաղորդմամբ՝ մայիսի 31-ին «Եվրասիական ինտեգրում եւ հեռանկարներ. ներուժը եւ հնարավորությունները ԵՄ-ի եւ երրորդ երկրների համար» խորագիրը կրող փորձագետների 2-րդ գիտաժողովից առաջ լրագրողների հետ ճեպազրույցում այս մասին նշեց ՀՀ-ում Ղազախստանի Հանրապետության արտակարգ և լիազոր դեսպան Թիմուր Ուրազաևը:
«Պետք է հասկանալ, որ Եվրասիական տնտեսական միությունում ոչ այնքան երկու երկրների, այլ բոլոր անդամ երկրների համագործակցություն է և ԵԱՏՄ-ում կան ընդհանուր կանոններ, որոնց հետևում են բոլոր անդամ-երկրները»,- ասաց Ուրազաևը և հավելեց, որ ԵԱՏՄ-ի անդամ երկրների շահերի բախմանը աստիճանաբար պետք է լուծում տրվի:
Դեսպանը չի կարծում, թե ԵԱՏՄ-ի անդամ երկրների համագործակցությունը ԵՄ-ի և երրորդ երկրների հետ կարող է հակասություններ առաջացնել:
«Պետք է համագործակցել նաև ԵԱՏՄ-ից դուրս, դա հնարավորություն կտա նոր շուկա մտնել, ուստի մեկուսացումը ոչ մի դրական տեղաշարժի չի հանգեցնի»,-ասաց Ուրազաևը:
Ըստ դեսպանի՝ գիտաժողովում քննարկվելու են հենց այդ համագործակցության հեռանկարները:
«Այսօրվա գիտաժողովում քննարկվելու են Եվրասիական տնտեսական միության հեռանկարները և, ամենակարևորը, ԵՄ-ի երրորդ երկրների հետ համագործակցության հնարավորությունները, ինչպես նաև գտնել օպտիմալ տարբերակներ ԵԱՏՄ-ում լուծելու տնտեսական, ներդրումային, ֆինանսական և այլ խնդիրներ: Մեր նպատակն է, որ յուրաքանչյուր քաղաքացի հասկանա, թե որոնք են ԵԱՏՄ-ի առավելությունները, ինչ խնդիրներ կան և այլն»,- նշեց Ուրազաևը:
