2019-թվականի վիճակագրությամբ, Հայաստանի ապրանքաշրջանառության 27 տոկոսը բաժին է ընկնում ՌԴ-ին, ինչը բացարձակ ֆինանսական արժեքով հասնում է երկու միլիարդ դոլարի շեմին: ՌԴ-ում հուսով են, որ եկող տարի Հայաստանին եւ ՌԴ-ին կհաջողվի հատել ապրանքաշրջանառության երկու միլիարդ դոլարի շեմը: Այս մասին այսօր ասաց ՌԴ դեսպանի խորհրդական Ալեքսեյ Սինեգուբովը` «Հայ-ռուսական հարաբերությունները 2019 թվականին. Հնարավորությունների նոր պատուհան» թեմայով քննարկման ժամանակ: Եվրասիական փորձագիտական ակումբի կազմակերպած ամենամյա քննարկումը թվով վեցերորդն էր:
Դեսպանի խորհրդականն անդրադարձավ Հայաստանում տեղի ունեցած թավշյա հեղափոխությունից հետո հայ-ռուսական հարաբերությունների զարգացման դինամիկային՝ նկատելով, որ անցնող տարում ՀՀ վարչապետ Նիկոլ Փաշինյանը եւ ՌԴ նախագահ Վլադիմիր Պուտինը հինգ հանդիպում են ունեցել: Չորս հանդիպում էլ եղել է ՀՀ վարչապետի եւ ՌԴ վարչապետի մակարդակով: Երեկ էլ երկու երկրների լիդերները հանդիպել են Սանկտ Պետերբուրգում: Ինտենսիվ շփումների համատեքստում դեսպանի խորհրդականը կարեւորեց արտաքին քաղաքական, ներքաղաքական, առեւտրատնտեսական հարցերով երկկողմ խորհրդատվությունները: Ալեքսեյ Սինեգուբովը հատուկ ընդգծեց ՀՀ վարչապետ Նիկոլ Փաշինյանի հայտարարությունները, որ Գյումրիում տեղակայված 102-րդ ռուսական ռազմաբազան Հայաստանի համար կարեւոր նշանակություն ունի:
Նա նկատեց նաեւ, որ ռուսական կապիտալով Հայաստանում աշխատող ընկերությունները`«Գազպրոմ Արմենիա», Հարավկովկասյան երկաթուղիներ, էլեկտրական ցանցեր եւ այլն, Հայաստանի բյուջեի խոշոր հարկատուներն են:
ԱԺ տարածաշրջանային եւ եվրասիական ինտեգրման հարցերի մշտական հանձնաժողովի ղեկավար Միքայել Մելքումյանն էլ, ընդհանուր առմամբ, դրական գնահատեց ԵԱՏՄ-ի շրջանակներում հարաբերությունների զարգացման դինամիկան: ԵԱՏՄ-ի շրջանակներում համագործակցությունները Միքայել Մելքումյանը կարեւորում է միասնական շուկաների ձեւավորման համատեքստում: ԵԱՏՄ համագործակցության շրջանակներում, ըստ նրա, դեռ խոչընդոտներ պարունակող 51 հարց կա, որոնք ուղղակի ՌԴ-ի հետ հարաբերությունների տիրույթում են եւ առաջիկա 3-4 տարիների աշխատանքի արդյունքը պետք է լինի դրանց հաղթահարումը:
Միքայել Մելքումյանն ասաց, որ Հայաստանում ռուսական կապիտալով աշխատող 2000 ընկերություն կա եւ մենք շահագրգիռ ենք հայկական տնտեսությունում ռուսական ներդրումներով: Ըստ նրա, Հայաստանը պետք է դառնա արդյունաբերական երկիր, որտեղ դոմինանտ պետք է լինի նաեւ IT ոլորտի զարգացումը, իսկ ԵԱՏՄ-ն մեզ համար ոչ միայն սպառման շուկա պետք է լինի, այլ Հայաստան ներդրումների ներգրավման հարթակ, այդ թվում նաեւ ՌԴ-ից:
Նա դրական գնահատեց նաեւ երկու երկրների խորհրդարանական համագործակցությունները: Հիշեցրեց, որ հենց այդ համագործակցությունների եւ բարձրացված հարցերի արդյունքում վերջերս ՀՀ եւ ՌԴ կառավարությունները համաձայնագիր ստորագրեցին`Վերին Լարսի անցակետում Հայաստանի մաքսային ներկայացուցիչ ունենալու մասին:Նա կարեւորեց նաեւ ԵԱՏՄ-ում խորհրդարանական հարթակի ստեղծումը, որը իր պնդմամբ զերծ է լինելու քաղաքական տարրերից եւ նպաստելու է բացառապես տնտեսական համագործակցությունների խորացմանը:
Քննարկմանը ներկա, իշխող «Իմ քայլը» խմբակցության պատգամավոր Ալեքսեյ Սանդիկովն էլ մանրամասն անդրադարձավ ՀԱՊԿ շրջանակներում համագործակցություններին` կարեւորել դրանց խորացումը Հայաստանի անվտանգային հարցերի համատեքստում:
Նելլի ԳՐԻԳՈՐՅԱՆ
