Հայ փորձագետների մեծ մասը կարծում է, որ ռուս-ադրբեջանական մերձեցումը և այդ հարաբերությունների նոր մակարդակի բարձրացումը ոչ մի կերպ կապված չէ Ռուսաստանի համար Հայաստանի դերի նվազման հետ։ Այս մասին Երեւան-Մոսկվա տեսակամուրջի ժամանակ հայտարարեց «Ինտեգրացիա եւ զարգացում» ՀԿ նախագահ, Եվրասիական փորձագիտական ակումբի համակարգող Արամ Սաֆարյանը։
«Հայ-ռուսական հարաբերությունները գտնվում են շատ բարձր մակարդակի վրա. այս տարվա սկզբից մեր երկրների ղեկավարները 7 անգամ հեռախոսազրույց են ունեցել, բազմաթիվ քննարկումներ են եղել տարբեր ձևաչափերով»,- մատնանշեց նա։
Ավելին, Արամ Սաֆարյանը նշեց, որ լավատեսական կանխատեսումները վկայում են, որ ռուս-ադրբեջանական նոր մակարդակի հարաբերությունները կարող են նպաստել Հարավային Կովկասում խաղաղության գործընթացին և որոշ հարցերի՝ սահմանազատման և սահմանագծման գործընթաց, երկաթուղու գործարկում, երկրների միջև տրանսպորտային հաղորդակցության բացում և այլնի ավելի հանգիստ, ավելի կառուցողական տոնով լուծմանը:
Միաժամանակ նա հիշեցրեց, որ Հայաստանում բավականին ցավոտ ընկալում կա մի շարք հարցերի շուրջ։ Մասնավորապես, Երևանն ակնկալում է, որ Ռուսաստանը կօգնի վերադարձնել Բաքվում պահվող գերիներին «բոլորը բոլորի դիմաց» սկզբունքով։ Հայաստանը նաև հույս ունի, որ Ռուսաստանի փորձը, հմտությունը, փաստաթղթերը և քաղաքական ազդեցությունը կօգնեն փոխադարձաբար լուծել մեր սահմանների սահմանազատման և սահմանագծման հարցը։
«Մենք ցանկանում ենք, որ Հարավային Կովկասի բոլոր ճանապարհները բացվեն, ինչպես նշված է համապատասխան փաստաթղթերում, այլ ոչ թե մեկ-երկու ճանապարհ, փոխադարձ անվտանգության պայմաններում»,- ընդգծեց Սաֆարյանը։
