Տնտեսագետ, Եվրասիական փորձագիտական ակումբի անդամ Աշոտ Թավադյանն այսօր հրավիրված ասուլիսին ներկայացրեց ինչպես 2017թ. առաջին հինգ ամսում ԵԱՏՄ անդամակցության համատեքստում Հայաստանի տնտեսության զարգացման միտումները, այնպես էլ կարևորագույն հիմնախնդիրները, որոնք առկա են և ԵԱՏՄ տարածքում և ՀՀ-ում:
Նա հիշեցրեց, որ Կառավարությունն իր հնգամյա ծրագրում կանխատեսում է ՀՆԱ-ի 5% աճ և նաև նշված է արտահանում–ՀՆԱ հարաբերակցությունը պետք է հասնի 40-45%–ի: «Դա նշանակում է, որ արտահանումը մեր մոտ անցյալ տարի եղել է 1,8 մլրդ դոլար և կհասնի 5 մլրդ դոլարի»,-ասաց նա:
Ըստ տնտեսագետի՝ նման աճ կարող է ապահովել միայն արտահանումը, մասնավորապես պատրաստի արտադրանքի արտահանումը: «Անցյալ տարի արտահանումն աճել է 20%-ով, դեպի ՌԴ՝ 53%, պատրաստսի արտադրանքի բացարձակ մեծամասնությունը գնացել է ՌԴ»,-ասաց նա և նշեց, որ այս տարի ևս ունենք աճ, 5 ամսում 29%, որից ՌԴ արտահանումը կազմում է 21,4%:
Աշոտ Թավադյանը նշեց, թե ինչով է պայմանավորված արտահանման աճի ավելացումը. անորոշությունը կարգավորվել է, մաքսային գործընթացները գնալով հստակեցվում են, կայունացել է նաև ռուսական ռուբլին: Ոչ պակաս կարևոր գործոն նա համարեց նաև գազի գնի նվազումը: Իսկ որպես ներքին խնդիր նա նշեց հարկաբյուջետային քաղաքականությունը: Ըստ նրա, մակրոցուցանիշների կոորդինացման խնդիր ունենք: Բարձր են տոկոսադրույքները, ներդրումների հարցն է սուղ:
Գազի գնի մասով տնտեսագետն ասաց, որ ըստ ԵԱՏՄ սկզբունքների գազի գինը 30%-ով պակաս պետք է լինի միջազգային գներից, մինչդեռ Հայաստանի դեպքում բարձր է, ինչը բանակցության խնդիր է: Խնդիրներից նա նշեց նաև կոռուպցիան, որն առակա է նաև ԵԱՏՄ գործընկերների մոտ ևս: «Տնտեսական աճ ունենալու համար առաջին հերթին պետք է լուծենք ներքին խնդիրները»,-ասաց նա:
Տնտեսագետ, Եվրասիական փորձագիտական ակումբի անդամ Աշոտ Թևիկյանը, խոսելով արդյունքներից, առաջին հերթին ուշադրություն հրավիրեց տնտեսական ակտիվության ցուցանիշին և նշեց, թե 5 ամսում դա 6,4% է կազմել, և միայն մայիս ամսին հասել է 8,9%-ի, որը 2013թ-ից տարվա ամենաբարձր ցուցանիշն է, որ գրանցվել է ՀՀ-ում:
Աշոտ Թևիկյանը ներկայացրեց գործոնները, առաջին հերթին արդյունաբերության ոլորտում գրանցվող աճն է, հինգ ամսում կազմել է 14,4%: Նա կարևոր համարեց առևտրաշրջանառությունը, որը կազմել է 12,8%, ծառայության ոլորտում 11% աճ է գրանցվել:
«Իհարկե այստեղ մեծ նշանակություն ունեն տրասնֆերտային մուտքերը, որոնք հիմնականում ՌԴ-ից են գալիս, աճը միայն մայիսին տրանսֆերտային աճը կազմել է 41,5%, իսկ ըստ կանխատեսումների երկրորդ կիսամյակին ևս սպասվում է տրանսֆերտային նման բարձր մուտքեր, քանի որ ՌԴ-ում նկատվում է տնտեսական ակտիվություն,»,- ասաց նա: