Պաշտոնական Երեւանի գործողությունների հետ կապված պարբերաբար տարակուսանք է առաջանում մեզ մոտ։ Այս մասին այսօր՝ ապրիլի 14-ին, լրագրողների հետ զրույցում ասաց ռուս քաղաքագետ Սերգեյ Միխեեւը։
Նա կասկած հայտնեց այն առումով, որ իրավիճակի վրա ազդում է Արեւմուտքը։
«Մենք, ցավոք, Նիկոլ Փաշինյանի՝ իշխանության գալու պահից Հայաստանի դիրքորոշման հետ կապված բազմաթիվ հարցեր ունենք»,-հավելեց նա։ Նա վստահություն հայտնեց, որ Արեւմուտքի նպատակը Հայաստանը Ռուսաստանից եւ Ռուսաստանը Հայաստանից կտրելն է, եւ այս իրավիճակում, նրա գնահատմամբ, Հայաստանը խաղալիք է Արեւմուտքի ձեռքում։ «Պետք է մի պարզ բան հասկանալ՝ Թուրքիան ԱՄՆ-ի մտերիմ դաշնակիցն է այս տարածաշրջանում եւ ՆԱՏՕ-ի անդամ։ Արեւմուտքը հույս ունի որոշ ժամանակ անց Հարավային Կովկասը, Կասպյան տարածաշրջանն ու Կենտրոնական Ասիան դարձնել թուրքական ազդեցության գոտի։ Հայաստանն այս սխեմայում կորում է եւ կհայտնվի ոչ նախանձելի վիճակում։ Երեւանի երկմտանքը, ինչպես նաեւ Հայաստանում արեւմտամետ լուրջ խմբերի առկայությունը մեզ մոտ մտավախություններ եւ կասկածներ են առաջացնում»,-նշեց Միխեեւը։
«Մեր հարաբերությունները դուրս են գալիս անվերջ հաշվարկների շրջանակից։ Եթե Հայաստանը հետաքրքիր համարի միութենական ինտեգրումը, ապա դա հնարավոր է։ Ռուսաստանի եւ Հայաստանի համար փոխադարձ ինտեգրումն օգտակար է։ Հայաստանի համար օգտակար է գոնե նրա համար, որպեսզի պահպանվի հավասարակշռությունը»,-պարզաբանեց քաղաքագետը։
Նա խոստովանեց, որ հայ-ռուսական հարաբերություններին պակասում են ընդհանուր սահմանները, ցամաքային կապերը։ «Մեր հարաբերություններում պետք է լինի ավելի շատ տնտեսություն, ավելի շատ վստահություն եւ աջակցություն անվտանգության հարցերում»,-եզրափակեց Միխեեւը։
